Gədəbəy rayonunda müəllimlərin ənənəvi sentyabr konfransı keçirildi
Gədəbəy rayonunda müəllimlərin ənənəvi sentyabr konfransı keçirildi
12 sentyabr 2018-ci il tarixdə Gədəbəy şəhəri Heydər Əliyev Mərkəzində Gədəbəy Rayon İcra Hakimiyyətinin başçısı İbrahim Mustafayevin, Gədəbəy Rayon Təhsil şöbəsinin müdiri Baxış Nağıyevin, Azərbaycan Respublikası Təhsil Nazirliyinin baş məsləhətçisi Mirbaba Babayevin, məktəb direktorlarının və ali məktəblərə qəbul olmuş abituriyentlərin iştirakı ilə müəllimlərin ənənəvi sentyabr konfransı keçirilmişdir.
Konfransdan əvvəl Gədəbəy Rayon İcra Hakimiyyətinin başçısı və rayonun təhsil işçiləri Ulu öndərin abidəsini ziyarət edib gül dəstələri qoymuşlar.
Gədəbəy Rayon Təhsil şöbəsinin müdiri Baxış Nağıyev “2018-2019-cu illərin yekunları və yeni tədris ilində qarşıda duran vəzifələr” mövzusunda çıxış etmiş, məruzədə bildirib ki, milli təhsilə dövlət qayğısının nəticəsidir ki, son illərdə təhsil sektorunun maliyyələşdirilməsi dinamik xətt üzrə inkişaf etmiş, təhsilə ayrılan büdcə vəsaiti xeyli dərəcədə artmışdır. İnkişaf proqramının reallaşdırılması nəticəsində, yeni məktəblər tikilir, mövcud məktəblər müasir avadanlıqlarla təchiz edilir, komputerləşdirilir. Fənn kurikulumlarının tətbiqi, şagird naliyyətlərinin qiymətləndirilməsi və müəllim hazırlığı sahəsində də ciddi islahatlar aparılır. Hazırda rayonun Dördlər, Talakənd, Əyrəvəng kəndlərində yeni modul tipli məktəb binası tikilir. Şəhər 2 nömrəli, Dəyirmandağ, Düzyurd kənd tam orta məktəblərində təmir işləri başa çatmaq üzrədir. Bütün bu tədbirlər təhsilin keyfiyyətinin yüksəldilməsi və davamlı inkişafı üçün etibarlı zəmin yaradır
Konfrans iştirakçılarının nəzərinə çatdırılmışdır ki, 2017-2018-ci tədris ilində rayonun 83 ümumtəhsil məktəbində 10440 nəfər şagirdin təlim-tərbiyəsi ilə 1570 nəfər müəllim məşğul olub. Yola saldığımız dərs ilinin yekunları olaraq bu il XI sinfi bitirən 731 nəfər şagirddən tələbə adını almaq üçün 468 nəfər abituriyent ali məktəblərə sənəd vermiş, onlardan 228 nəfəri tələbə adına layiq görülmüşdür. Sevindirici haldır ki, 54 nəfər abituriyent 500-dən çox, 24 nəfər isə 600-dən çox bal toplayıb. Vətənpərvərlik sahəsində aparılan işlərin nəticəsidir ki, bu il ali hərbi məktəbə 9 nəfər qəbul olmuşdur. Çalburun kənd tam orta məktəbinin məzunu İbrahimov Fərid Oktay oğlu ən yüksək nəticə – 682 bal toplayaraq Tibb universitetinin müalicə işi fakultəsinə qəbul olmuşdur.
Məruzə ətrafında müzakirələrdə Zəhmətkənd kənd tam orta məktəbinin direktoru Murad Bayramov, Qızılqaya kənd tam orta məktəbinin gənc müəllimi Tural Topçuyev, Çalburun kənd tam orta məktəbinin məzunu İbrahimov Fərid Oktay oğlu, validey Leyla Mustafayeva çıxış edərək ürək sözlərini söyləmişlər.
Təhsil Nazirliyinin nümayəndəsi Mirbaba Babayev tədris ilində pedaqoji kollektivlər qarşısında duran vəzifələrdən danışıb, bir sıra tövsiyələrini vermişdir.
Konfransda çıxış edən Gədəbəy Rayon İcra Hakimiyyətinin başçısı İbrahim Mustafayev əvvəlcə yeni dərs ili və Bilik günü münasibətilə rayonun bütün müəllim və şagirdlərini, o cümlədən tələbə adını qazanmış abituriyentləri təbrik edərək, 2018-ci ildə qəbul imtahanlarında 600-dən yuxarı bal toplayan tələbələrə qiymətli hədiyyələr təqdim etmişdir.
